काठमाडौं । सिरहा जिल्लाको भगवानपुर गाउँपालिका-४ स्थित सीमा ईलाकाबाट शनिबार सशस्त्र प्रहरीले विभिन्न किसिमका लागूऔषधसहित एक जनालाई पक्राउ गरेको छ ।
पक्राउ पर्नेमा सोही जिल्लाको लहान नगरपालिका-८ बस्ने २२ वर्षिय दिपेन्द्र कुमार मण्डल रहेका छन् ।
उनलाई सशस्त्र प्रहरी बल नेपाल बिओपी ईनर्वाबाट खटिएको सशस्त्र प्रहरीले शंका लागि जाँच गर्दा उनको साथमा नाईट्राभेट ट्याब्लेट ३ सय वटा, क्रोमोथाजिन हाईप्रोक्लोराईक ईन्जेक्सन ३२ वटा, डाईजेपाम ईन्जेक्स्न २७ वटा र नोफ्रिन ईन्जेक्सन २८ वटा फेला पारेको हो ।
पक्राउ परेका मण्डललाई बरामद लागूऔषधसहित आवश्यक कारवाहीको लागि नेपाल प्रहरीलाई बुझाईएको सशस्त्र प्रहरीले जनाएको छ ।
यसैगरी सशस्त्र प्रहरी बल नेपाल बिओपी बेल्दारीबाट खटिएको सशस्त्र प्रहरीले बारा जिल्लाको पचरौता नगरपालिका-५ राम जानकी ईलाकाबाट आइतबार १ सय वटा डाईजेपाम ईन्जेक्सनसहित दुई जनालाई पक्राउ गरेको छ ।
पक्राउ पर्नेहरुमा भारतमा घर बताउने १९ वर्षिय राजेश मुखिया र १८ वर्षिय राजकिशोर मुखिया रहेका छन् ।
भारतबाट नेपालतर्फ आउँदै गरेका उनीहरुलाई गस्तीमा खटिएको सशस्त्र प्रहरीले शंका लागि जाँच गर्दा उनीहरुको साथमा उक्त लागूऔषध तथा २ थान मोबाइल सेट, एउटा पर्स र ३ हजार ७ सय १ भारतीय रुपैयाँ फेला पारेको हो ।
पक्राउ परेका दुवै जनालाई बरामद लागूऔषध, मोबाइल, पर्स र रुपैयाँसहित आवश्यक कारवाहीको लागि नेपाल प्रहरीलाई बुझाईएको सशस्त्र प्रहरीले जनाएको छ ।
