काठमाडौं । सिभिल ग्रुपको ठगीका विषयमा अनुसन्धान गर्दै आइरहेको नेपाल प्रहरीको केन्द्रीय अनुसन्धान ब्युरो (सीआईबी)मा उजुरी आउने क्रम बढ्दै गएको छ ।
गत १४ कात्तिकसम्ममा सिभिल ग्रुपबाट ठगिएको भन्दै सीआईबीमा १३ सय ६४ जनाको जाहेरी परेकोमा सोमबारसम्म आइपुग्दा १४ सय ४१ जनाले ठगिएको भन्दै जाहेरी दिएका छन् ।
तीन वर्ष अघिदेखि रकम फिर्ता नपाएको भन्दै सिभिल ग्रुपको ठगीका विषयमा जाहेरी पर्न थालेपछि सीआईबीले सो संस्थाका सञ्चालकसहितका कर्मचारीलाई पक्राउ गरेको थियो । हाल १२ जना पूर्वकर्मचारी र हाल कार्यरत कर्मचारी सीआईबीको अनुसन्धानको दायरामा छन् ।
सीआईबीले सिभिल ग्रुपका सञ्चालक तथा नेकपा एमालेका पूर्वसांसद इच्छाराम तामाङसहित १२ जनालाई थुनामा राखेरै अनुसनधान गरिरहेको छ । सीआईबीले उनीहरूविरुद्ध हालसम्म ५ अर्ब ५३ करोड २६ लाख ६९ हजार ४ सय ४२ रुपैयाँबराबरको ठगीका जाहेरी परेको जनाएको छ ।
सीआईबीका प्रमुख डीआईजी धिरजप्रताप सिंहले सोमबारसम्म १४ सय ४१ जनाले सीआईबीमा सिभिल ग्रुपविरुद्ध ठगी तथा रकम अनियमितताको जाहेरी दिएको जानकारी दिए ।
‘अहिलेसम्म १४ सय ४१ जनाबाट सिभिल ग्रुपविरुद्ध ठगीको जाहेरी आएको छ, हालसम्म ५ अर्ब ५३ करोड २६ लाख ६९ हजार ४ सय ४२ रुपैयाँ ठगी भएको जाहेरी परेको छ, थप अनुसन्धान जारी छ,’ सीआईबीका प्रमुख डीआईजी सिंहले राजधानीसँग भने ।
तामाङ सञ्चालक रहेको सिभिल ग्रुपले विभिन्न व्यक्तिबाट करोडौं रुपैयाँभन्दा बढी ठगी गरेको आरोपमा उजुरी परेपछि सीआईबीले मुख्य सञ्चालक तामाङसहित १२ जनालाई पक्राउ गरेर अनुसन्धान गर्दै आइरहेको छ ।
पक्राउ पर्नेहरूमा तत्कालीन सिभिल सेभिङ एन्ड क्रेडिट सहकारी संस्थाका सञ्चालक र कर्मचारीसमेत छन् । सिभिल सेभिङ एन्ड क्रेडिट सहकारी संस्थाका तत्कालीन अध्यक्ष तामाङ, वर्तमान अध्यक्ष केशवलाल श्रेष्ठ र प्रबन्धक भगवानबहादुर सिंह छन् ।
उनीहरूलाई काठमाडौं जिल्ला अदालतबाट सांगठित अपराधमा ६० दिनको म्याद थप गराएर अनुसन्धान जारी राखिएको प्रहरीले जनाएको छ । सीआईबीले ठगीमा अन्य व्यक्तिहरूसमेत तानिन सक्ने र त्यस तर्फसमेत अनुसन्धान जारी रहेको प्रहरीले जनाएको छ ।
सिभिल ग्रुपबाट ठगिनेमा व्यापारी, नेपाल प्रहरीका पूर्वकर्मचारी, नेपाल सरकारका पूर्वसचिव, यूएनमा कार्यरत कर्मचारी, गृहिणी, विदेशमा बसोवास गर्नेहरूको परिवारलगायत छन् । यस्तै, केही आईएनजीओको रकम पनि ठगी भएको गुनासो आएको सीआईबीका प्रमुख सिंहले जानकारी दिएका हुन् ।
उनका अनुसार एकै परिवारको १ लाखदेखि ४ करोडसम्म पनि ठगी भएको पाइएको छ । केही व्यक्तिको परिवारका तीन जनासम्म पनि ठगीमा परेका छन् । यो समाचार आजको राजधानी दैनिकमा महेश्वर गौतमले लेखेका छन् ।
