सोलुखुम्बु । प्रहरी महानिरीक्षक शैलेश थापा क्षेत्रीले ईलाका प्रहरी कार्यालय लुक्ला सोलुखुम्बु परिसरमा नवनिर्मित कार्यालय तथा आवास भवनको बुधबार आयोजित एक कार्यक्रमबीच उद्घाटन गरेका छन् । साथै उनले प्रहरी कार्यमा सहयोग गर्ने विभिन्न महानुभावहरूलाई कदरपत्र तथा उत्कृष्ट कार्य गर्ने प्रहरी कर्मचारीहरूलाई पुरस्कार समेत प्रदान गरेका छन् ।
उक्त अवसरमा प्रहरी महानिरीक्षक थापा क्षेत्रीले शान्ति सुरक्षा सबैको साझा जिम्मेवारी रहेको उल्लेख गर्दै नयाँ भवनसँगै कार्यरत प्रहरी कर्मचारीहरुमा नयाँ सोच र धारणा आउनुपर्ने बताए । प्रहरी कर्मचारीहरूको व्यवहार तथा बोलीवचन सदैव उत्कृष्ट हुनुपर्नेमा उनले जोड दिए ।
प्रहरी महानिरीक्षक थापा क्षेत्रीले निष्पक्ष र सेवामुखी भावनाका साथ आफ्नो आचरण र व्यवहारमा शुद्धता कायम गरी क्रियाशील रहँदै जनसमुदायको सेवा र सुरक्षामा गम्भीर भएर काम गर्न प्रहरी कर्मचारीहरूलाई निर्देशन समेत दिए । लुक्लावासीसँग साक्षात्कार गर्न पाउँदा आफूलाई गौरव महशुस भएको उल्लेख गर्दै उनले जनआकांक्षा, प्रविधिमैत्री प्रहरी सेवा, जनभावनाको कदर, संसारभरीबाट आउने पर्यटकहरूको सुरक्षाप्रति प्रहरी कर्मचारीहरू विशेष सजग र संवेदनशील हुनुपर्ने बताए ।
कार्यक्रममा धन्यवाद ज्ञापन गर्दै १ नम्बर प्रदेश प्रहरी कार्यालय विराटनगरका प्रमुख प्रहरी नायव महानिरीक्षक अरुण कुमार बिसीले सुबिधा सम्पन्न भवन प्राप्त भएसँगै कार्यरत प्रहरी कर्मचारीहरू नागरिक सेवामा अझ प्रभावकारी ढंगले अगाडि बढ्ने विश्वास व्यक्त गरे ।
उक्त कार्यक्रममा सोलुखुम्बु जिल्लाका प्रमुख जिल्ला अधिकारी गणेश विक्रम शाहीले शुभकामना मन्तव्य व्यक्त गरेका थिए । साथै खुम्बु पासाङल्हामु गाउँपालिका वडा नम्बर २ का वडा अध्यक्ष आङ फुर्वा शेर्पाले मन्तव्य व्यक्त गर्दै शान्ति सुरक्षा कायम गर्न अहोरात्र खटिने प्रहरी र स्थानीयबीच सहकार्य गर्न वडावासी प्रतिवद्ध रहेको बताए ।
जिल्ला प्रहरी कार्यालय सोलुखुम्बुका प्रमुख प्रहरी नायव उपरीक्षक कवित कटवालले स्वागत मन्तव्य व्यक्त गरेका उक्त कार्यक्रममा प्रहरी नायव उपरीक्षक ई.अनिल रानाले भवन निर्माण सम्बन्धी प्रतिवेदन प्रस्तुत गरेका थिए । साढे २ तले उक्त भवन नेपाल सरकारको नियमित बजेटबाट कूल २ करोड ६६ लाख ३३ हजार रुपैयाँको लागतमा निर्माण कार्य सम्पन्न भएको हो ।
कार्यक्रममा १ नम्बर प्रदेशस्थित प्रहरी अधिकृतहरू, स्थानीय जनप्रतिनिधिहरू, राजनीतिक दलका स्थानीय प्रतिनिधिहरू, भद्रभलादमी एवं स्थानीयवासीहरूको उपस्थिति रहेको थियो ।
